ಸ್ಪೇನ್ನಲ್ಲಿ ಭೀಕರ ಕಾಡ್ಗಿಚ್ಚು: 12 ವಿದೇಶಿ ಪ್ರಜೆಗಳ ಸಾವು, 23 ನಾಪತ್ತೆ
ಮ್ಯಾಡ್ರಿಡ್ (ಸ್ಪೇನ್),ಜು11: ದಕ್ಷಿಣ ಸ್ಪೇನ್ನ ಅಲ್ಮೇರಿಯಾ ಪ್ರಾಂತ್ಯದ ಲಾಸ್ ಗಲ್ಲಾರ್ಡೊಸ್ ಮತ್ತು ಬೆಡಾರ್ ಜಿಲ್ಲೆಗಳ ಅರಣ್ಯ ಪ್ರದೇಶದಲ್ಲಿ ಹಠಾತ್ ಕಾಣಿಸಿಕೊಂಡ ಭೀಕರ ಕಾಡ್ಗಿಚ್ಚಿಗೆ (ವೈಲ್ಡ್ಫೈರ್) ಕನಿಷ್ಠ 12 ಜನರು ಸಜೀವ ದಹನವಾಗಿದ್ದು, 23ಕ್ಕೂ ಹೆಚ್ಚು ಮಂದಿ ನಾಪತ್ತೆಯಾಗಿದ್ದಾರೆ.
ಮೃತರ ಪೈಕಿ ಬಹುತೇಕರು ಬ್ರಿಟನ್ ಸೇರಿದಂತೆ ವಿವಿಧ ದೇಶಗಳ ಪ್ರವಾಸಿಗರು ಮತ್ತು ವಿದೇಶಿ ನಿವಾಸಿಗಳಾಗಿದ್ದಾರೆ ಎಂದು ಅಧಿಕಾರಿಗಳು ಖಚಿತಪಡಿಸಿದ್ದಾರೆ. ತಪ್ಪಾದ ಮಾರ್ಗವೇ ಮೃತ್ಯುಕೂಪವಾಯಿತು. ಕಾಡ್ಗಿಚ್ಚಿನ ತೀವ್ರತೆ ಹೆಚ್ಚಾಗುತ್ತಿದ್ದಂತೆ ಸ್ಥಳೀಯ ಆಡಳಿತವು ಸುರಕ್ಷಿತ ಜಾಗದಲ್ಲಿಯೇ ಆಶ್ರಯ ಪಡೆಯುವಂತೆ ಸೂಚನೆ ನೀಡಿತ್ತು. ಆದರೆ, ಪ್ರಾಣಭಯದಿಂದ ಕಾರು ಹಾಗೂ ಕಾಲ್ನಡಿಗೆಯ ಮೂಲಕ ತಪ್ಪಿಸಿಕೊಳ್ಳಲು ಯತ್ನಿಸಿದವರೇ ಹೆಚ್ಚಾಗಿ ಸಾವಿಗೀಡಾಗಿದ್ದಾರೆ.
ಬ್ರಿಟನ್ ಮೂಲದ ನಾಲ್ಕು ಪ್ರಜೆಗಳು ತಮ್ಮ ಬಲಗೈ ಚಾಲನೆಯ ಕಾರಿನೊಳಗೆಯೇ ಸಜೀವ ದಹನವಾಗಿದ್ದಾರೆ. ಇನ್ನುಳಿದ 8 ಜನರು ಕಾರುಗಳನ್ನು ಬಿಟ್ಟು ಸುರಕ್ಷಿತವಲ್ಲದ ಕಣಿವೆಯ ರಸ್ತೆಯಲ್ಲಿ ಓಡಲು ಹೋಗಿ ಬೆಂಕಿಯ ಕೆನ್ನಾಲಿಗೆಗೆ ಸಿಲುಕಿ ಮೃತಪಟ್ಟಿದ್ದಾರೆ ಎಂದು ಅಂಡಲೂಸಿಯಾದ ತುರ್ತು ನಿಗಾ ವಿಭಾಗದ ಮುಖ್ಯಸ್ಥ ಆಂಟೋನಿಯೊ ಸ್ಯಾನ್ಜ್ ತಿಳಿಸಿದ್ದಾರೆ.
ಕಳೆದ ಕೆಲವು ವಾರಗಳಿಂದ ಯುರೋಪ್ ಖಂಡದಾದ್ಯಂತ ದಾಖಲೆಯ 40 ಡಿಗ್ರಿ ಸೆಲ್ಸಿಯಸ್ಗಿಂತಲೂ ಅಧಿಕ ತಾಪಮಾನ ದಾಖಲಾಗುತ್ತಿದ್ದು, ತೀವ್ರ ಬಿಸಿಗಾಳಿ ಬೀಸುತ್ತಿದೆ. ರಸ್ತೆ ಬದಿಯ ವಿದ್ಯುತ್ ಲೈನ್ ಕಂಬವೊಂದು ಬಿದ್ದ ಪರಿಣಾಮ ಒಣಗಿದ ಗಿಡಗಂಟಿಗಳಿಗೆ ಬೆಂಕಿ ಹೊತ್ತಿಕೊಂಡಿದೆ. ನಂತರ ಗಂಟೆಗೆ 50 ಕಿ.ಮೀ ವೇಗದಲ್ಲಿ ಬೀಸಿದ ಪ್ರಬಲ ಗಾಳಿಯಿಂದಾಗಿ ಕೇವಲ ಎರಡು ಗಂಟೆಗಳಲ್ಲಿ ಸುಮಾರು 15 ಕಿಲೋಮೀಟರ್ವರೆಗೂ ಜ್ವಾಲೆ ವ್ಯಾಪಿಸಿದೆ.
ಸುಮಾರು 4.000 ಹೆಕ್ಟೇರ್ ಪ್ರದೇಶದ ಅರಣ್ಯ ಹಾಗೂ ಕೃಷಿ ಭೂಮಿ ಸಂಪೂರ್ಣ ಭಸ್ಮವಾಗಿದೆ.ಇದು ನಮ್ಮ ಪ್ರಾಂತ್ಯದ ಇತಿಹಾಸದಲ್ಲೇ ಕಂಡ ಅತ್ಯಂತ ದುರಂತದ ಕಾಡ್ಗಿಚ್ಚು.ಇಡೀ ಅಂಡಲೂಸಿಯಾ ಭಾಗ ಶೋಕ ಸಾಗರದಲ್ಲಿ ಮುಳುಗಿದೆ.ಜುವಾನ್ಮಾ ಮೊರೆನೊ,ಅಂಡಲೂಸಿಯಾ ಪ್ರಾಂತ್ಯದ ಮುಖ್ಯಸ್ಥ ಯುದ್ಧೋಪಾದಿಯಲ್ಲಿ ರಕ್ಷಣಾ ಕಾರ್ಯದುರಂತದ ತೀವ್ರತೆ ಹೆಚ್ಚಾಗಿರುವುದರಿಂದ ಸ್ಪೇನ್ನ ಮಿಲಿಟರಿ ತುರ್ತು ದಳದ 220ಕ್ಕೂ ಹೆಚ್ಚು ಸೈನಿಕರು, 150ಕ್ಕೂ ಅಧಿಕ ಅಗ್ನಿಶಾಮಕ ಸಿಬ್ಬಂದಿ, 30 ವಿಮಾನಗಳು ಹಾಗೂ ಹೆಲಿಕಾಪ್ಟರ್ಗಳ ಮೂಲಕ ಬೆಂಕಿ ನಂದಿಸುವ ಕಾರ್ಯಾಚರಣೆಯಲ್ಲಿ ತೊಡಗಿದ್ದಾರೆ.
ಬೆಂಕಿಯ ಹೊಗೆಯಿಂದ ಉಸಿರಾಟದ ತೊಂದರೆ ಅನುಭವಿಸುತ್ತಿರುವ ಮತ್ತು ಸುಟ್ಟ ಗಾಯಗಳಾಗಿರುವ ಹಲವರನ್ನು ಹೆಲಿಕಾಪ್ಟರ್ ಮೂಲಕ ಸೆವಿಲ್ಲೆಯ ಆಸ್ಪತ್ರೆಗೆ ದಾಖಲಿಸಲಾಗಿದೆ.ಸುರಕ್ಷಿತ ಸ್ಥಳಗಳಿಂದ ಸುಮಾರು 1,400 ಜನರನ್ನು ಈಗಾಗಲೇ ಸ್ಥಳಾಂತರಿಸಲಾಗಿದ್ದು, ನಾಪತ್ತೆಯಾದವರಿಗಾಗಿ ತೀವ್ರ ಹುಡುಕಾಟ ಮುಂದುವರಿದಿದೆ. ಸ್ಪೇನ್ ಪ್ರಧಾನಿ ಪೆಡ್ರೊ ಸ್ಯಾಂಚೆಝ್ ದುರಂತಕ್ಕೆ ತೀವ್ರ ಸಂತಾಪ ಸೂಚಿಸಿದ್ದು, ಸಂತ್ರಸ್ತರಿಗೆ ಅಗತ್ಯವಿರುವ ಎಲ್ಲಾ ನೆರವು ನೀಡುವುದಾಗಿ ಘೋಷಿಸಿದ್ದಾರೆ.
