‘WhatsApp Plus’ ಪ್ಲಾನ್ ಬಿಡುಗಡೆ ಮಾಡಿದ ವಾಟ್ಸಾಪ್ : ಏನಿದೆ ವಿಶೇಷತೆಗಳು..?
ನವದೆಹಲಿ, ಜೂನ್ 22: ವಿಶ್ವದ ಅತ್ಯಂತ ಜನಪ್ರಿಯ ಮೆಸೇಜಿಂಗ್ ಆ್ಯಪ್ ಆಗಿರುವ ವಾಟ್ಸಾಪ್ (WhatsApp) ತನ್ನ ಬಳಕೆದಾರರಿಗಾಗಿ ಹೊಸ ‘WhatsApp Plus’ ಸಬ್ಸ್ಕ್ರಿಪ್ಷನ್ ಪ್ಲಾನ್ ಅನ್ನು ಪರಿಚಯಿಸಿದೆ. ಇದುವರೆಗೆ ಸಂಪೂರ್ಣ ಉಚಿತ ಸೇವೆ ನೀಡುತ್ತಿದ್ದ ವಾಟ್ಸಾಪ್, ಇದೀಗ ತಿಂಗಳಿಗೆ ₹79 ಪಾವತಿಸುವ ಬಳಕೆದಾರರಿಗೆ ಹೆಚ್ಚುವರಿ ಪ್ರೀಮಿಯಂ ಫೀಚರ್ಗಳನ್ನು ಒದಗಿಸುತ್ತಿದೆ.
ಈ ಹೊಸ ಪ್ಲಾನ್ ಭಾರತದಲ್ಲಿನ Android ಹಾಗೂ iOS ಬಳಕೆದಾರರಿಗೆ ಲಭ್ಯವಿದ್ದು, ಆ್ಯಪ್ ಅನ್ನು ಹೆಚ್ಚು ವೈಯಕ್ತಿಕವಾಗಿ ಕಸ್ಟಮೈಸ್ ಮಾಡಿಕೊಳ್ಳಲು ಅವಕಾಶ ಕಲ್ಪಿಸುತ್ತದೆ.
WhatsApp Plus ವಿಶೇಷತೆಗಳೇನು?
18 ಹೊಸ ಕಲರ್ ಥೀಮ್ಗಳು
ಸಾಂಪ್ರದಾಯಿಕ ಹಸಿರು-ಬಿಳಿ ಬಣ್ಣದ ಬದಲಿಗೆ ಬಳಕೆದಾರರು ವೈಬ್ರೆಂಟ್ ಬ್ಲೂ, ರಾಯಲ್ ಪರ್ಪಲ್, ಫಾರೆಸ್ಟ್ ಗ್ರೀನ್, ಫ್ಯೂಷಿಯಾ ಪಿಂಕ್ ಸೇರಿದಂತೆ 18 ವಿಭಿನ್ನ ಬಣ್ಣಗಳ ಥೀಮ್ಗಳನ್ನು ಆಯ್ಕೆ ಮಾಡಿಕೊಳ್ಳಬಹುದು.
14 ಹೊಸ ಆ್ಯಪ್ ಐಕಾನ್ಗಳು
ವಾಟ್ಸಾಪ್ನ ಡಿಫಾಲ್ಟ್ ಐಕಾನ್ ಬದಲಿಗೆ 14 ಹೊಸ ವಿನ್ಯಾಸದ ಐಕಾನ್ಗಳನ್ನು ಬಳಸುವ ಅವಕಾಶ ನೀಡಲಾಗಿದೆ.
20 ಚಾಟ್ಗಳನ್ನು ಪಿನ್ ಮಾಡುವ ಸೌಲಭ್ಯ
ಸಾಮಾನ್ಯ ವಾಟ್ಸಾಪ್ನಲ್ಲಿ ಕೇವಲ 3 ಚಾಟ್ಗಳನ್ನು ಮಾತ್ರ ಪಿನ್ ಮಾಡಲು ಅವಕಾಶವಿದ್ದರೆ, WhatsApp Plus ಬಳಕೆದಾರರು 20 ಚಾಟ್ಗಳನ್ನು ಪಿನ್ ಮಾಡಬಹುದು. ಇದರಿಂದ ಪ್ರಮುಖ ವ್ಯಕ್ತಿಗಳು ಹಾಗೂ ಗ್ರೂಪ್ಗಳನ್ನು ಸುಲಭವಾಗಿ ಮೇಲ್ಭಾಗದಲ್ಲೇ ಇರಿಸಿಕೊಳ್ಳಬಹುದು.
ವಿಶೇಷ ರಿಂಗ್ಟೋನ್ಗಳು ಮತ್ತು ಸ್ಟಿಕ್ಕರ್ಗಳು
‘Flutter’, ‘Ripple’, ‘Meadow’ ಹಾಗೂ ‘Carnival’ ಸೇರಿದಂತೆ 10 ವಿಶೇಷ ರಿಂಗ್ಟೋನ್ಗಳು ಮತ್ತು ಹಲವು ಪ್ರೀಮಿಯಂ ಸ್ಟಿಕ್ಕರ್ ಪ್ಯಾಕ್ಗಳು ಈ ಪ್ಲಾನ್ನಲ್ಲಿ ದೊರೆಯಲಿವೆ.
ಮೊದಲ ತಿಂಗಳು ಉಚಿತ
ಹೊಸ ಸಬ್ಸ್ಕ್ರೈಬರ್ಗಳಿಗೆ ವಾಟ್ಸಾಪ್ ವಿಶೇಷ ಆಫರ್ ನೀಡಿದ್ದು, ಮೊದಲ ಒಂದು ತಿಂಗಳು ಸಂಪೂರ್ಣ ಉಚಿತ ಟ್ರಯಲ್ ಸೌಲಭ್ಯವನ್ನು ಘೋಷಿಸಿದೆ. ಬಳಕೆದಾರರು 30 ದಿನಗಳ ಕಾಲ ಎಲ್ಲಾ ಪ್ರೀಮಿಯಂ ಫೀಚರ್ಗಳನ್ನು ಯಾವುದೇ ಶುಲ್ಕವಿಲ್ಲದೆ ಬಳಸಬಹುದು.
ಯಾರಿಗೆ ಹೆಚ್ಚು ಉಪಯುಕ್ತ?
ವಾಟ್ಸಾಪ್ ಅನ್ನು ಹೆಚ್ಚು ಸಮಯ ಬಳಸುವವರು, ಆ್ಯಪ್ಗೆ ವಿಭಿನ್ನ ಲುಕ್ ನೀಡಲು ಬಯಸುವವರು ಹಾಗೂ ಹೆಚ್ಚಿನ ಚಾಟ್ಗಳನ್ನು ಪಿನ್ ಮಾಡಬೇಕಾದವರಿಗೆ ಈ ಪ್ಲಾನ್ ಉಪಯುಕ್ತವಾಗಬಹುದು.
ಆದರೆ ಕೇವಲ ಮೆಸೇಜ್ ಹಾಗೂ ಕಾಲ್ಗಳಿಗೆ ಮಾತ್ರ ವಾಟ್ಸಾಪ್ ಬಳಸುವವರಿಗೆ ಈ ಸಬ್ಸ್ಕ್ರಿಪ್ಷನ್ ಅಗತ್ಯವಿಲ್ಲ. ಏಕೆಂದರೆ ವಾಟ್ಸಾಪ್ನ ಮೂಲಭೂತ ಸೇವೆಗಳು ಎಂದಿನಂತೆ ಉಚಿತವಾಗಿಯೇ ಮುಂದುವರಿಯಲಿವೆ.
