ಹತ್ಯೆಯಾದ ಹಮಾಸ್ ಮುಖ್ಯಸ್ಥನ ಯಾಹ್ಯಾ ಸಿನ್ವಾರ್ ಕೊನೆ ಕ್ಷಣಗಳ ಡ್ರೋನ್ ವಿಡಿಯೋ ಬಿಡುಗಡೆ ಮಾಡಿದ ಇಸ್ರೇಲ್
ಜೆರುಸಲೇಂ: ಇಸ್ರೇಲ್ ಗುರುವಾರ ಗಾಜಾ ಕಾರ್ಯಾಚರಣೆಯಲ್ಲಿ 62 ವಯಸ್ಸಿನ ಹಮಾಸ್ ಮುಖ್ಯಸ್ಥ ಯಾಹ್ಯಾ ಸಿನ್ವಾರ್ನನ್ನು ಹತ್ಯೆ ಮಾಡಿತು. ಅಕ್ಟೋಬರ್ 16, ಗುರುವಾರದಂದು ರಾಫಾದ ಟೆಲ್ ಸುಲ್ತಾನ್ ಪ್ರದೇಶದಲ್ಲಿ ಇಸ್ರೇಲ್ ಸೇನೆ ನಡೆಸಿದ ಒಂದು ಯೋಜಿತವಲ್ಲದ ಮಿಲಿಟರಿ ಕಾರ್ಯಾಚರಣೆಯಲ್ಲಿ ಸಿನ್ವರ್ ಹತ್ಯೆಯಾಗಿದ್ದಾನೆ. ಸಿನ್ವರ್ ಹತ್ಯೆ ಹಮಾಸ್ ವಿರುದ್ಧ ನಡೆಯುತ್ತಿರುವ ಯುದ್ಧದಲ್ಲಿ ಇಸ್ರೇಲ್ ಪಾಲಿಗೆ ಮಹತ್ವದ ಸಾಧನೆಯಾಗಿದೆ.
ಕಳೆದ ವರ್ಷ ಅಂದ್ರೆ, 2023ರ ಅಕ್ಟೋಬರ್ 7 ರಂದು ಇಸ್ರೇಲ್ ವಿರುದ್ದ ನಡೆದಿದ್ದ ದಾಳಿಯಲ್ಲಿ ಯಾಹ್ಯಾ ಸಿನ್ವಾರ್ ಕೈವಾಡ ಇತ್ತು ಎಂಬ ಆರೋಪ ಇತ್ತು. ಹೀಗಾಗಿಯೇ ತನ್ನ ಸೇನೆಗೆ ಯಾಹ್ಯಾ ಸಿನ್ವಾರ್ ಹತ್ಯೆ ಮಾಡಲು ಇಸ್ರೇಲ್ ಆದೇಶ ನೀಡಿತ್ತು.
ಹಲವಾರು ಗಂಟೆಗಳ ಗಾಳಿ ಸುದ್ದಿಗಳ ಬಳಿಕ, ಅಂತಿಮವಾಗಿ ಅಕ್ಟೋಬರ್ 17, ಗುರುವಾರದಂದು ಯಾಹ್ಯಾ ಸಿನ್ವರ್ ಸಾವಿಗೀಡಾಗಿರುವುದು ಖಚಿತವಾಯಿತು. ಇಸ್ರೇಲ್ ಮಿಲಿಟರಿ ಇಸ್ರೇಲಿ ಗುಪ್ತಚರ ಸಂಸ್ಥೆ ಶಿನ್ಬೆಟ್, 2011ರಲ್ಲಿ ಬಿಡುಗಡೆಯಾಗುವ ಮುನ್ನ ಸಿನ್ವರ್ ಇಸ್ರೇಲಿ ಸೆರೆಮನೆಯಲ್ಲಿರುವಾಗ ಸಂಗ್ರಹಿಸಿದ್ದ ಹಲ್ಲು ಮತ್ತು ಬೆರಳಚ್ಚಿನ ದಾಖಲೆಗಳ ಮೂಲಕ ಆತನನ್ನು ಗುರುತಿಸಿತ್ತು.
ಅಕ್ಟೋಬರ್ 7ರ ದಾಳಿಯ ರೂವಾರಿಯಾಗಿದ್ದ ಸಿನ್ವರ್, ಕಳೆದ ಒಂದು ವರ್ಷದಿಂದ ಗಾಜಾದಲ್ಲೇ ಬಚ್ಚಿಟ್ಟುಕೊಂಡಿದ್ದ. ಯುದ್ಧ ಆರಂಭವಾದ ಬಳಿಕ ಇಸ್ರೇಲ್ ಪಡೆಗಳು ಆತನನ್ನು ಗುರಿಯಾಗಿಸಲು ಹಲವಾರು ಪ್ರಯತ್ನಗಳನ್ನು ನಡೆಸಿದ್ದರೂ, ಆತ ಸೆರೆಯಾಗುವುದನ್ನು ಅಥವಾ ಹತ್ಯೆಯಾಗುವುದನ್ನು ತಪ್ಪಿಸಿಕೊಂಡಿದ್ದ.
ಕೊನೆಯ ಕ್ಷಣಗಳ ವಿಎಒ ರಿಲೀಸ್ :
ಹಮಾಸ್ ಮುಖ್ಯಸ್ಥ ಯಾಹ್ಯಾ ಸಿನ್ವಾರ್ನ ‘ಕೊನೆಯ ಕ್ಷಣಗಳು’ ಎಂದು ಹೇಳಿದ ಡ್ರೋನ್ ದೃಶ್ಯಗಳನ್ನು ಇಸ್ರೇಲ್ ರಕ್ಷಣಾ ಪಡೆಗಳು ಬಿಡುಗಡೆ ಮಾಡಿದೆ. ಹಾನಿಗೊಳಗಾದ ಮತ್ತು ಶಿಥಿಲಗೊಂಡ ಮನೆಯೊಳಗೆ ಸಿನ್ವಾರ್ ಮಂಚದ ಮೇಲೆ ಕುಳಿತಿರುವುದನ್ನು ವೀಡಿಯೋ ತೋರಿಸಿದೆ. ಆತನ ಅಂತಿಮ ಕ್ಷಣಗಳಲ್ಲಿ, ಡ್ರೋನ್ಗೆ ವಸ್ತುವನ್ನು ಎಸೆಯುವುದನ್ನು ವೀಡಿಯೋದಲ್ಲಿ ಕಾಣಬಹುದು.
