ವಿಶ್ವದ ಮೊದಲ ಟ್ರಿಲಿಯನೇರ್ ಆಗಿ ಹೊಸ ಇತಿಹಾಸ ನಿರ್ಮಿಸಿದ ಎಲಾನ್ ಮಸ್ಕ್
ನ್ಯೂಯಾರ್ಕ್: ಬಾಹ್ಯಾಕಾಶ ತಂತ್ರಜ್ಞಾನ ಕ್ಷೇತ್ರದ ದಿಗ್ಗಜ ಸಂಸ್ಥೆ ಸ್ಪೇಸ್ಎಕ್ಸ್ ಷೇರು ಮಾರುಕಟ್ಟೆ ಪ್ರವೇಶಿಸಿದ ಬೆನ್ನಲ್ಲೇ ಸಂಸ್ಥಾಪಕ Elon Musk ವಿಶ್ವದ ಮೊದಲ ಟ್ರಿಲಿಯನೇರ್ ಆಗಿ ಹೊಸ ಇತಿಹಾಸ ನಿರ್ಮಿಸಿದ್ದಾರೆ. ಸ್ಪೇಸ್ಎಕ್ಸ್ ಷೇರುಗಳ ಭಾರೀ ಏರಿಕೆಯಿಂದ ಮಸ್ಕ್ ಅವರ ಒಟ್ಟು ಸಂಪತ್ತು 1 ಟ್ರಿಲಿಯನ್ ಡಾಲರ್ ಗಡಿ ದಾಟಿರುವುದಾಗಿ ವರದಿಗಳು ತಿಳಿಸಿವೆ.
ವಾಲ್ ಸ್ಟ್ರೀಟ್ನಲ್ಲಿ ಸ್ಪೇಸ್ಎಕ್ಸ್ ಷೇರುಗಳು ಲಿಸ್ಟಿಂಗ್ ದಿನವೇ 11 ಶೇಕಡಕ್ಕಿಂತ ಹೆಚ್ಚು ಏರಿಕೆ ಕಂಡು 150 ಡಾಲರ್ ಮಟ್ಟ ತಲುಪಿದವು. ಇದರ ಪರಿಣಾಮವಾಗಿ ಮಸ್ಕ್ ಅವರ ಸಂಪತ್ತಿನಲ್ಲಿ ಗಣನೀಯ ಹೆಚ್ಚಳವಾಗಿದೆ.
ಬ್ಲೂಮ್ಬರ್ಗ್ ಹಾಗೂ ಫೋರ್ಬ್ಸ್ ವರದಿಗಳ ಪ್ರಕಾರ, ಮಸ್ಕ್ ಅವರ ಒಟ್ಟು ಆಸ್ತಿ ಮೌಲ್ಯ 1.05 ರಿಂದ 1.1 ಟ್ರಿಲಿಯನ್ ಡಾಲರ್ಗಳ ನಡುವೆ ಅಂದಾಜಿಸಲಾಗಿದೆ. ಅವರ ಸಂಪತ್ತಿನ ಬಹುಪಾಲು ಸ್ಪೇಸ್ಎಕ್ಸ್ (766 ಬಿಲಿಯನ್ ಡಾಲರ್) ಹಾಗೂ ಟೆಸ್ಲಾ (280 ಬಿಲಿಯನ್ ಡಾಲರ್) ಷೇರುಗಳಲ್ಲಿ ಹೂಡಿಕೆಯಾಗಿದೆ.
ಸ್ಪೇಸ್ಎಕ್ಸ್ ತನ್ನ ಆರಂಭಿಕ ಸಾರ್ವಜನಿಕ ಕೊಡುಗೆ (IPO) ಮೂಲಕ 75 ಬಿಲಿಯನ್ ಡಾಲರ್ಗಿಂತ ಹೆಚ್ಚು ಬಂಡವಾಳ ಸಂಗ್ರಹಿಸಿದ್ದು, ಇದು ಜಾಗತಿಕ ಷೇರು ಮಾರುಕಟ್ಟೆ ಇತಿಹಾಸದಲ್ಲೇ ಅತಿ ದೊಡ್ಡ ಐಪಿಒ ಎಂದು ಪರಿಗಣಿಸಲಾಗಿದೆ. ಈ ಮೂಲಕ 2019ರಲ್ಲಿ ಸೌದಿ ಅರಾಮ್ಕೋ ಸ್ಥಾಪಿಸಿದ್ದ 29.4 ಬಿಲಿಯನ್ ಡಾಲರ್ಗಳ ದಾಖಲೆಯನ್ನು ಹಿಂದಿಕ್ಕಿದೆ.
ಕಂಪನಿಯು 55.5 ಕೋಟಿಗೂ ಅಧಿಕ ಷೇರುಗಳನ್ನು ಮಾರಾಟ ಮಾಡಿದ್ದು, ಪ್ರತಿ ಷೇರಿನ ಆರಂಭಿಕ ಬೆಲೆಯನ್ನು 135 ಡಾಲರ್ ಎಂದು ನಿಗದಿಪಡಿಸಲಾಗಿತ್ತು. ಆದರೆ ಹೂಡಿಕೆದಾರರ ಭಾರೀ ಬೇಡಿಕೆಯಿಂದಾಗಿ ಷೇರು ಬೆಲೆ 150 ಡಾಲರ್ಗಿಂತಲೂ ಹೆಚ್ಚು ಮಟ್ಟದಲ್ಲಿ ವಹಿವಾಟು ಆರಂಭಿಸಿತು.
ಸ್ಪೇಸ್ಎಕ್ಸ್ಗೆ 75 ಬಿಲಿಯನ್ ಡಾಲರ್ ಬಂಡವಾಳ ಅಗತ್ಯವಿದ್ದರೂ, ಹೂಡಿಕೆದಾರರಿಂದ ಸುಮಾರು 250 ಬಿಲಿಯನ್ ಡಾಲರ್ ಮೌಲ್ಯದ ಅರ್ಜಿಗಳು ಸಲ್ಲಿಕೆಯಾಗಿರುವುದು ಕಂಪನಿಯ ಮೇಲಿನ ವಿಶ್ವಾಸವನ್ನು ತೋರಿಸಿದೆ. ಐಪಿಒ ನಂತರ ಸ್ಪೇಸ್ಎಕ್ಸ್ನ ಒಟ್ಟು ಮಾರುಕಟ್ಟೆ ಮೌಲ್ಯ 2 ಟ್ರಿಲಿಯನ್ ಡಾಲರ್ ದಾಟಿದ್ದು, ಅಮೆರಿಕದ ಅತಿದೊಡ್ಡ ಸಾರ್ವಜನಿಕ ಕಂಪನಿಗಳ ಪೈಕಿ ಆರನೇ ಸ್ಥಾನಕ್ಕೇರಿದೆ.
ಇದಷ್ಟೇ ಅಲ್ಲದೆ, ಕಂಪನಿಯಲ್ಲಿ ಹಲವು ವರ್ಷಗಳಿಂದ ಕಾರ್ಯನಿರ್ವಹಿಸುತ್ತಿದ್ದ ಸುಮಾರು 4,400ಕ್ಕೂ ಹೆಚ್ಚು ಉದ್ಯೋಗಿಗಳು ಐಪಿಒ ಯಶಸ್ಸಿನ ಪರಿಣಾಮವಾಗಿ ರಾತ್ರೋರಾತ್ರಿ ಕೋಟ್ಯಧಿಪತಿಗಳಾಗಿದ್ದಾರೆ. ಸಂಬಳದ ಭಾಗವಾಗಿ ಪಡೆದಿದ್ದ ಷೇರುಗಳ ಮೌಲ್ಯ ಹಲವು ಪಟ್ಟು ಏರಿಕೆಯಾಗಿರುವುದರಿಂದ ಅನೇಕ ಉದ್ಯೋಗಿಗಳ ಆರ್ಥಿಕ ಸ್ಥಿತಿ ಗಮನಾರ್ಹವಾಗಿ ಸುಧಾರಿಸಿದೆ.
