ಬೆಂಗಳೂರು ರೇವ್ ಪಾರ್ಟಿ ಪ್ರಕರಣಕ್ಕೆ ಸಂಬಂಧಿಸಿದಂತೆ 88 ಮಂದಿ ವಿರುದ್ಧ ಚಾರ್ಜ್ಶೀಟ್ ಸಲ್ಲಿಕೆ
ಬೆಂಗಳೂರು: ಹೆಬ್ಬಗೋಡಿ ಸಮೀಪದ ಜಿ.ಆರ್. ಫಾರ್ಮ್ ಹೌಸ್ನಲ್ಲಿ ಮೇ 19ರಂದು ‘ಸನ್ ಸೆಟ್ ಟು ಸನ್ ರೈಸ್’ ಹೆಸರಲ್ಲಿ ನಡೆದ ರೇವ್ ಪಾರ್ಟಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಚಾರ್ಜ್ಶೀಟ್ ಸಲ್ಲಿಕೆ ಮಾಡಲಾಗಿದೆ. ಸಿಸಿಬಿ ಪೊಲೀಸರು ಬೆಂಗಳೂರು ಗ್ರಾಮಾಂತರ 8ನೇ ಹೆಚ್ಚುವರಿ ಜಿಲ್ಲಾ ಸೆಷನ್ಸ್ ನ್ಯಾಯಾಲಯಕ್ಕೆ ಮಂಗಳವಾರ 1086 ಪುಟಗಳ ಚಾರ್ಜ್ಶೀಟ್ ಸಲ್ಲಿಸಿದರು.
ಇದರ ಮೇಲೆ ದಾಳಿ ನಡೆಸಿದ್ದ ಸಿಸಿಬಿ ಪೊಲೀಸರು, ಫಾರ್ಮ್ಹೌಸ್ನಲ್ಲಿ ಬಚ್ಚಿಟ್ಟಿದ್ದ 15.56 ಗ್ರಾಂ ಎಂಡಿಎಂಎ, 6.2 ಗ್ರಾಂ ಕೊಕೇನ್, 6 ಗ್ರಾಂ ಹೈಡ್ರೊ ಗಾಂಜಾ, ಎರಡು ಐಷಾರಾಮಿ ಕಾರು ಜಪ್ತಿ ಮಾಡಿದ್ದರು. ತಡರಾತ್ರಿ ಪಾರ್ಟಿಯಲ್ಲಿ ಬೆಂಗಳೂರು ಹಾಗೂ ಆಂಧ್ರ ಮೂಲದ ಫ್ಯಾಷನ್ ಡಿಸೈನರ್ಸ್, ಕಾಲೇಜು ವಿದ್ಯಾರ್ಥಿಗಳು, ಖಾಸಗಿ ಕಂಪನಿ ಉದ್ಯೋಗಿಗಳು ಭಾಗಿಯಾಗಿದ್ದರು. ಎಂಡಿಎಂಎ, ಹೈಡ್ರೋ ಗಾಂಜಾ, ಕೊಕೇನ್ ಡ್ರಗ್ ಹಂಚಲಾಗಿತ್ತು. ನಟಿ ಹೇಮಾ ಎಂಡಿಎಂಎ ಸೇವಿಸಿದ್ದರು. ಒಟ್ಟು 27 ಮಂದಿ ಮಹಿಳೆಯರೂ ಸೇರಿ 79 ಮಂದಿ ಡ್ರಗ್ಸ್ ಸೇವಿಸಿರುವುದು ವೈದ್ಯಕೀಯ ವರದಿ, ಎಫ್ಎಸ್ಎಲ್ ವರದಿಗಳಲ್ಲಿ ದೃಢವಾಗಿದೆ.
ರೇವ್ ಪಾರ್ಟಿ ಭಾಗವಹಿಸಿದ್ದವರಿಗೆಲ್ಲ ಡ್ರಗ್ಸ್ ಹಂಚಿದ್ದು ಡೆಂಟಿಸ್ಟ್ ಎಂದು ತನಿಖೆಯಲ್ಲಿ ಬಯಲಾಗಿದೆ. ರೇವ್ ಪಾರ್ಟಿಯಲ್ಲಿ ನಟಿ ಹೇಮಾ ಜತೆಗೆ ಮತ್ತೊಬ್ಬ ಯುವ ನಟಿ ಕೂಡ ಪಾಲ್ಗೊಂಡಿದ್ದರು. ಆದರೆ, ಅವರು ಡ್ರಗ್ಸ್ ಸೇವಿಸಿರಲಿಲ್ಲ. ವೈದ್ಯಕೀಯ ಪರೀಕ್ಷೆಯಲ್ಲೂ ದೃಢಪಟ್ಟಿಲ್ಲ. ಈ ನಿಟ್ಟಿನಲ್ಲಿ ನಟಿಯನ್ನೂ ಸಾಕ್ಷಿದಾರರನ್ನಾಗಿ ಪರಿಗಣಿಸಲಾಗಿದೆ. ಜತೆಗೆ, ಪಾರ್ಟಿಯಲ್ಲಿದ್ದ ಹಲವು ಮಂದಿ ಹಾಗೂ ಫಾರ್ಮ್ಹೌಸ್ನ ಸಿಬ್ಬಂದಿ ಸೇರಿ ಒಟ್ಟು 82 ಮಂದಿ ಸಾಕ್ಷಿದಾರರನ್ನು ಪರಿಗಣಿಸಲಾಗಿದೆ.
ಉದ್ಯಮಿ ವಿಜಯವಾಡ ಮೂಲದ ಎಲ್ ವಾಸು ಮಾಲೀಕತ್ವದ ವಿಕ್ಟರಿ ಇವೆಂಟ್ ಮ್ಯಾನೇಜ್ಮೆಂಟ್ ಕಂಪನಿಗೆ ಒಂದು ವರ್ಷ ಕಳೆದಿತ್ತು. ಮೇ 19ಕ್ಕೆ ವಾಸು ಕೂಡ 35ನೇ ವರ್ಷಕ್ಕೆ ಕಾಲಿಟ್ಟಿದ್ದ. ಈ ಸಂತೋಷವನ್ನು ಒಟ್ಟಿಗೆ ಆಚರಿಸಲು ನಿರ್ಧರಿಸಿ ಎಲೆಕ್ಟ್ರಾನಿಕ್ ಸಿಟಿ ಸಮೀಪದ ಜಿ.ಆರ್. ಫಾರ್ಮ್ಹೌಸ್ ಬುಕ್ ಮಾಡಿ ‘ಸನ್ ಸೆಟ್ ಟು ಸನ್ ರೈಸ್’ ಹೆಸರಿನಲ್ಲಿ ಸುಮಾರು 10 ಲಕ್ಷ ರೂ. ವೆಚ್ಚದಲ್ಲಿ ಪಾರ್ಟಿ ಆಯೋಜಿಸಲಾಗಿತ್ತು.
ವಾಸು ತನ್ನ ಕುಟುಂಬದ ಗೆಳತಿ ನಟಿ ಹೇಮಾ ಸೇರಿ ಹಲವು ತಾರೆಯರಿಗೆ ಆಹ್ವಾನ ನೀಡಿದ್ದರು. ಅರುಣ್ಕುಮಾರ್ ಕೂಡ ಹಲವರನ್ನು ಪಾರ್ಟಿಗೆ ಕರೆದಿದ್ದರು. ರೇವ್ ಪಾರ್ಟಿಯಲ್ಲಿಊಟ, ಮೋಜು ಮಸ್ತಿ ಜತೆಗೆ ಡ್ರಗ್ಸ್ ಕೂಡ ಇರಲಿದೆ ಎಂಬುದು ಮೊದಲೇ ಆಹ್ವಾನಿತರಿಗೆ ತಿಳಿಸಲಾಗಿತ್ತು. ಈ ಕಾರಣಕ್ಕಾಗಿಯೇ ಬಹುತೇಕರು ಪಾರ್ಟಿಗೆ ಹಾಜರಾಗಿದ್ದರು.
ವಿಜಯವಾಡ ಮೂಲದ ದಂತ ವೈದ್ಯ ರಣಧೀರ್ ಬಾಬು ಹಾಗೂ ಮೊಹಮದ್ ಅಬೂಬಕರ್ ಸಿದ್ಧಿಕಿ, ಪಾರ್ಟಿಗೆ ಆಗಮಿಸಿದ್ದವರಿಗೆ ಕೊಕೇನ್, ಎಂಡಿಎಂಎ ಹಾಗೂ ಹೈಡ್ರೋ ಗಾಂಜಾ ಹಂಚಿದ್ದರು. ಡ್ರಗ್ಸ್ ಆತಿಥ್ಯ ನೀಡಿದ್ದ ಎಲ್.ವಾಸು,ಎಲ್.ವೈ ಅರುಣ್ಕುಮಾರ್, ನೈಜೀರಿಯಾ ಪ್ರಜೆ ಆಗಸ್ಟಿನ್ ಟಾಡಾ ಸೇರಿದಂತೆ 9 ಮಂದಿ ವಿರುದ್ಧ ಎನ್ಡಿಪಿಎಸ್ ಕಾಯಿದೆ 20 (ಬಿ) ಆರೋಪದ ಅನ್ವಯ ಚಾರ್ಜ್ಶೀಟ್ ಸಲ್ಲಿಸಲಾಗಿದೆ ಎಂದು ಸಿಸಿಬಿ ಮೂಲಗಳು ತಿಳಿಸಿವೆ.
