ಕೊಲಂಬಿಯಾದಲ್ಲಿ 7.4 ತೀವ್ರತೆಯ ಪ್ರಭಲ ಭೂಕಂಪ, 20ಕ್ಕೂ ಹೆಚ್ಚು ಮಂದಿ ಸಾವು
ಬೊಗೋಟಾ: ದಕ್ಷಿಣ ಅಮೆರಿಕದ ಕೊಲಂಬಿಯಾದಲ್ಲಿ ಸೋಮವಾರ ಪ್ರಬಲ ಭೂಕಂಪ ಸಂಭವಿಸಿದ್ದು, ಆರಂಭಿಕ ಅಂದಾಜಿನ ಪ್ರಕಾರ ಭೂಕಂಪದ ತೀವ್ರತೆ 7.4 ಎಂದು ಅಮೆರಿಕದ ಭೂವೈಜ್ಞಾನಿಕ ಸಮೀಕ್ಷೆ (USGS) ತಿಳಿಸಿದೆ. ಭೂಕಂಪದ ಕಂಪನಗಳು ಕೊಲಂಬಿಯಾದ ಹಲವು ಭಾಗಗಳಲ್ಲಿ ಹಾಗೂ ವೆನೆಜುವೆಲಾ ಗಡಿ ಸಮೀಪದ ಪ್ರದೇಶಗಳಲ್ಲೂ ಅನುಭವವಾಗಿವೆ.ಭೀಕರ ಭೂಕಂಪದಲ್ಲಿ 20ಕ್ಕೂ ಹೆಚ್ಚು ಮಂದಿ ಸಾವನ್ನಪ್ಪಿರುವ ವರದಿಯಾಗಿದೆ.
USGS ಪ್ರಕಾರ, ಭೂಕಂಪವು 12:34 UTC, ಅಂದರೆ ಸ್ಥಳೀಯ ಕಾಲಮಾನದಲ್ಲಿ ಬೆಳಗ್ಗೆ ಸುಮಾರು 7:34ಕ್ಕೆ, ಕೊಲಂಬಿಯಾದ ಚೋಕೊ (Chocó) ಇಲಾಖೆಯ ಸ್ಯಾನ್ ಜೋಸ್ ಡೆಲ್ ಪಾಲ್ಮಾರ್ ಪಟ್ಟಣದ ಸುಮಾರು 5 ಕಿ.ಮೀ. ಪೂರ್ವದಲ್ಲಿ ಸಂಭವಿಸಿದೆ. ಭೂಕಂಪದ ಕೇಂದ್ರವು ಭೂಮಿಯ ಸುಮಾರು 107 ಕಿ.ಮೀ. ಆಳದಲ್ಲಿತ್ತು.
ಆದರೆ, ಅಮೆರಿಕದ ಸುನಾಮಿ ಎಚ್ಚರಿಕೆ ವ್ಯವಸ್ಥೆ ಭೂಕಂಪದ ತೀವ್ರತೆಯನ್ನು 7.1 ಎಂದು ಅಂದಾಜಿಸಿದೆ. ಇದೇ ವೇಳೆ, ಭೂಕಂಪದ ಬಳಿಕ ಸುನಾಮಿ ಎಚ್ಚರಿಕೆ ನೀಡಲಾಗಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಚೋಕೊ ಗವರ್ನರ್ ನುಬಿಯಾ ಕೆರೊಲಿನಾ ಕಾರ್ಡೋಬಾ-ಕುರಿ ಅವರ ಪ್ರಕಾರ, ಭೂಕಂಪದಿಂದ ಇಲಾಖೆಯ ರಾಜಧಾನಿ ಕ್ವಿಬ್ಡೊದಲ್ಲಿ ಹಲವು ಕಟ್ಟಡಗಳಿಗೆ ಗಮನಾರ್ಹ ಹಾನಿಯಾಗಿದ್ದು, ಕೆಲವರು ಗಾಯಗೊಂಡಿದ್ದಾರೆ.
ಅಧಿಕಾರಿಗಳು ಈಗಾಗಲೇ ಹಾನಿಯ ಪ್ರಮಾಣವನ್ನು ಪರಿಶೀಲಿಸುವ ಕಾರ್ಯ ಆರಂಭಿಸಿದ್ದಾರೆ. ಭೂಕಂಪದ ಬಳಿಕ ಪುನರಾವರ್ತಿತ ಕಂಪನಗಳು (ಆಫ್ಟರ್ಶಾಕ್ಸ್) ಸಂಭವಿಸುವ ಸಾಧ್ಯತೆ ಇರುವುದರಿಂದ ಜನರು ಎಚ್ಚರಿಕೆಯಿಂದ ಇರುವಂತೆ ಸೂಚಿಸಲಾಗಿದೆ.
ಭೂಕಂಪದ ಕೇಂದ್ರಬಿಂದು ಸ್ಯಾನ್ ಜೋಸ್ ಡೆಲ್ ಪಾಲ್ಮಾರ್ ಸಮೀಪದಲ್ಲಿದ್ದರೂ, ಅದರ ಕಂಪನಗಳು ಕೇಂದ್ರಬಿಂದುವಿನಿಂದ ದೂರದ ಕೊಲಂಬಿಯಾದ ಹಲವು ಪ್ರದೇಶಗಳಲ್ಲೂ ಅನುಭವವಾಗಿವೆ. ವೆನೆಜುವೆಲಾ ಗಡಿಯತ್ತಲೂ ಕಂಪನದ ಅನುಭವವಾಗಿರುವ ಬಗ್ಗೆ ಆರಂಭಿಕ ವರದಿಗಳು ತಿಳಿಸಿವೆ.
ಕೊಲಂಬಿಯಾದಲ್ಲಿ ಈ ಹಿಂದೆ ಹಲವು ಪ್ರಬಲ ಭೂಕಂಪಗಳು ಸಂಭವಿಸಿವೆ. 1979ರಲ್ಲಿ ನೈರುತ್ಯ ಕೊಲಂಬಿಯಾದ ತುಮಾಕೊ ಸಮೀಪ ಸಂಭವಿಸಿದ 8.0 ತೀವ್ರತೆಯ ಭೂಕಂಪ ದೇಶದ ಅತ್ಯಂತ ವಿನಾಶಕಾರಿ ಭೂಕಂಪಗಳಲ್ಲಿ ಒಂದಾಗಿದೆ.
